Nangrugin ti Net Service Contracting Program ti Department of Transportation (DOTr) iti agduduma a paset ti pagilian, a sakop ti nasurok 800 a ruta.
Segun ken ni DOTr Secretary Giovanni Lopez, nagilatang ti gobierno ti P800 milyon a pondo para iti service contracting program iti road transport sector a manamnama nga maipatungpal iti uneg ti dua a lawas.
Inlawlawag ni Lopez nga agtultuloy latta ti registration ti LTFRB para kadagiti kayat na a makipaset ti programa.
Impasigurado ti opisial a nasken a mapadaras daytoy a maaprobaran ken dagus a maka-biahe dagiti pasahero.
Kabayatanna, impakaammo ni Lopez nga irusat pay ti LTFRB ti panagusar ti QR code system tapno agbalin a mas epektibo a ma-monitor ti actual a tartarayen a distansia dagiti public utility vehicle a karaman iti programa.
Agbalin nga alternatibo ti QR code system para kadagiti driver nga awan ti GPS tracking device na tapno masigurado ti nasayaat ken transparent a panangited ti bayad.
