Saan a lapped ti utang tapno saan a makamartsa iti graduation ti maysa nga estudiante, kas sagudayen ti House Bill 8616 nga impila ni Paranaque Rep. Brian Yamsuan.
Iti salinong ti gakat ket maikkaten ti kondision kadagiti pagadalan a maparitan ti estudiante iti graduation ceremony no adda utang iti pagadalan, ket impaganetget ni Yamsuan, a karbengan ti agad-adal ti makapan iti graduation rites.
Sakup ti gakat dagiti amin a public ken private basic education, higher educational institution, ken technical-vocational institution.
Launen pay ti gakat a mabalin a tumulong ti DSWD iti panagbayad iti utang ti estudiante no awan pagbayadna gapu iti didigra, emergency ken force majeure.
Tapno masigurado a makakolekta dagiti pagadalan iti utang manipud iti estudiante ket mabalin a saanda nga ited ti diploma ken dadduma pay nga academic documents agingga a mabayadan ti obligasion dagiti estudiante.
