Kwinestyonaran ni Senator-judge Risa Hontiveros ti dati nga Special Disbursing Officer (SDO) ti Office of the Vice President (OVP) a ni Gina Acosta mainaig ti maysa a recipient ti confidential funds a nakainagan iti “Clarisse Hontiveros.”
Inaramid ni Hontiveros ti clarificatory question iti Senate impeachment trial kalpasan a nadlaw na a ti petsa ti maipagarup a panangawat ti confidential funds ni “Clarisse Hontiveros,” a Pebrero 24, 2023 ket kapada ti petsa ti panagkasangay-na.
Insungbat ni Acosta nga adda dagiti nagan ti recipient nga in-verify na ken ni dati a Vice Presidential Security and Protection Group (VPSG) head Col. Raymund Dante Lachica.
Nupay kasta, imbaga met ni Lachica a confidential ti nadakamat nga impormasion.
Inlawlawag ni Acosta a saan na a personal nga ammo no adda pakainaigan ti nagan a “Clarisse Hontiveros” ken ni Senator Hontiveros wenno apay nga agpada ti petsa ti pannakaawat ti confidential funds iti panagkasangay-na.
Kabayatanna, sinaludsod pay ni Hontiveros ni Acosta no isu laeng ti masapul a responsable iti panagaramat ti confidential funds gapu ta isuna ti SDO ken immawat ti cash advance.
Simmungbat met ni Acosta a kas SDO ket isuna ti accountable officer.
Ngem pinasingkedan ni Hontiveros nga adda met ti nadutokan nga implementing officer para iti confidential activities ken dinamag na pay no sino ti madusa no saan a mailawlawag no sadino ti napanan ti kuwarta.
