Impasigurado ni Ilocos Sur Governor Jerry Singson a dekalidad amin dagiti infrastructure project a naar-aramid iti probinsia idi naglabas ken agdama nga administrasyon.
Dayta ket iti baet dagiti nagsasaruno nga anomalya a naduktalan ti gobierno kadagiti flood control projects iti nadumaduma a paset ti pagilian.
Iti pannaki-uman ti Bombo Radyo Vigan ken ni Singson, no man adda dagiti nadadael a proyekto ket napaneknekan met babaen iti imbestigasyon a gapu iti kinapigsa ti tudo, saan ket a gapu ta substandard dagiti materyales a naaramat.
Innayon ni Singson a dagus a maisardeng ti pannakaaramid ti maysa nga infrastructure project no adda uray bassit laeng a diperensya a makita.
Silulukat ti opisina ti gobernador no adda man kayat nga idatag dagiti umili a parikut iti lugarda mainaig kadagiti napondoan a proyekto iti imprastraktura.
