Namnamaen ni Senador Erwin Tulfo nga iti panagsubli ditoy pagilian ni dati a Cong. Zaldy Co ket malpasen ti imbestigasion ti Senado ken mapilaanen iti kaso dagiti karaman iti flood control scandal.
Dayta ket tapno matutukan met ti gobierno dagiti sabali pay a nadagsen a parikut ti pagilian nangruna ita nga adda pay laeng riribuk iti Middle East.
Impaganetget ni Tulfo a kabayatan ti panangipangruna ti gobierno iti panangsulbar iti krisis, rebbeng a singiren ti gobierno dagiti adda pagbasulanna iti anomalya iti flood control project.
Kinunana pay a nasken nga ipangruna ti epekto ti riribuk iti Middle East nangruna iti agtultuloy nga ingingina ti presio ti langis, ket saan a lipaten dagiti pudno a karaman iti saan a husto a pannakaaramat ti flood control funds.
