Pinasingkedan ni Interior Secretary Jonvic Remulla, nga adda baro a wagas ti Philippine government a manglaban iti illegal a droga, a pakairaman iti supply chain.
Segun kenni Remulla, nakikammayet ni Presidente Ferdinand Marcos Jr. kadagiti law enforcement officials tapno mapagsaritaan ti strategy a mangipangpangruna iti panangsurot kadagiti kangrunaan nga importer ken supplier ti droga.
Nagkedked met ni Remulla nga inaganan dagiti specific individuals, ngem inyunay-unayna a nabigbigen ti gobierno dagiti karaman ti drug trade.
Binigbig pay ni Remulla ti agtultuloy a parikut iti uneg ti Muntinlupa City Jail, gapu ta maibilang kas “number one source of drug trade.”
Kinunana nga agtartrabaho ti gobierno a mangiyakar kadagiti high-value detainees iti maximum-security facility tapno malapdan ti panagwaras ti droga iti uneg ti prison system.
