VIGAN CITY – Kiniddaw ni Ilocos Sur Governor Ryan Singson nga awan koma pay ti Local Government Unit ditoy probinsia nga aggatang iti bakuna kontra ti Covid19 ta kayatna a sangsangkamaysa ti probinsia a manguray iti pammilin ti national government iti roll out ken panaggatang ti bakuna.
Dayta ket kalpasan ti pannakitinnulag ti Vigan City Government iti AstraZeneca Pharmaceuticals para ti panaggatangda iti 100-120K a doses ti bakuna a pinartuat ti nasao a kompania.
Iti pannaki-uman ti Bombo Radyo Vigan ken ni Gov. Singson, saan a naipakaammo nga umuna iti provincial government ti panaggatang ti siudad ti bakuna nga agpaay kadagiti residente nga agtawen iti sangapulo ket walo agpangato numan pay isu koma ti kangrunaan ta mangplanplanoda met laeng ti addang iti nasao a banag.
Awan pay ti kasiguradwanna no ania a bakuna ti ipaay ti national government iti tunggal probinsia ngem impanamnama ti gobernador a supusupanda ti kurangna.
Nupay kasta, agtataripnong ti League of the Provinces of the Philippines inton Mierkoles kadua da Health Secretary Francisco Duque III ken ni Vaccine Czar Carlito Galvez Jr tapno pagpapatangan no ania ti masapul nga aramidenda.
Nakasagana met ti gobernador nga isu ti umuna a mabakunaan ditoy probinsia no la ketdi natalged ti bakuna a maipaay tapno maallukoy dagiti umili.
