VIGAN CITY- Posible a manayunan pay ti gatad dagiti nadadael gapu iti panagbettak ti Taal volcano idi January 12 agsipud ta agtultuloy pay laeng iti damage assessment nga isaysayangkat ti National Disaster Risk Reduction and Management Council (NDRRMC).
Dayta iti pinasingkedan ni NDRRMC spokesman Mark Timbal iti pannaki-uman ti Bombo Radyo Vigan kenkuana.
Segun ken ni Timbal, mapatta-patta nga umabot ti PHP 3, 208, 763,000 iti inisyal a gatad dagiti nadadael iti benneg ti imprastraktura ken agrikultura gapu iti panagbettak iti nasao a bulkan.
Inlawlawag nga idi damo ket saan da a makaited iti inisyal a damage assessment agsipud ta saan da a napalubusan a sumrek idi kadagiti naapektaran a lugar isu nga aerial survey laeng iti insayangkat da.
Ngem manipud idi bimmasiten dagiti lugar a naisakup ti danger zone, nakastrek iti assessment team ti NDRRMC kadagiti naapektaran a lugar isu a nakaisayangkat da iti initial assessment.
