Impila ni Sen. Robin Padilla ti gakat a mangdusa iti siasinoman a mangigagara nga agaramat iti saan a pudno nga address tapno saan a makipaset ti maysa a respondent iti preliminary investigation.
Iti salinong ti Senate Bill No. 1957, posible a maibalud iti innem a bulan agingga dua a tawen ken agmuelta iti P100,000 agingga P300,000 ti siasinoman a mapaneknekan a mangigagara a mangted iti peke nga address.
Segun ken ni Padilla, gagem ti gakat a salakniban dagiti tao kontra iti manglokloko wenno abusado ken masigurado a maikkan ti respondent ti gundaway a maammoan ken sungbatan dagiti pammabasol kontra kenkuana.
Kinunana pay a ti panagaramat iti saan a pudno nga address ket mangsayang iti oras ken pondo iti justice system ken rumbeng a madusa ti siasinoman nga agaramid iti dayta tapno malusotan ti husto a proseso.
Ipaganetget ti gakat a ti preliminary investigation ket maisaysayangkat tapno maammoan no adda umdas a pagbasaran tapno makasoan ti maysa a tao.
