Manamnama nga agipasa ti counter affidavits inton Setyembre 15 da dati nga Ateneo de Manila University men’s basketball head coach Tab Baldwin ken sangapulo ket maysa pay a nakasoan mainaig iti pannakatay dagiti dua nga student-athletes.
Daytoy ti impakaammo ni Justice Undersecretary Ian Norman Dato iti maysa a press conference iti Department of Justice (DOJ).
Segun ken ni Dato, rinugyanen ti DOJ ti preliminary investigation iti pannakalmes ti Ateneo student-athletes a da Rene Baterbonia ken Divine Adili iti maysa a team building activity idiay Dipaculao, Aurora idi Hunyo 8.
Pinasingkedan ni Dato a nagisayangkat ti ahensia ti umuna a panagdengngeg para iti pleminarary investigation idi Lunes ken nakatuding ti maikadua a panagdengngeg inton Setyembre 15.
