Impila da Deputy Speakers Jayjay Suarez iti Quezon ken Jay Khonghun iti Zambales ti “Ginhawa Kit” a bukbuklen dagiti gakat ken resolusyon a gagem a mangted ti nam-ay iti gastos iti kuryente, internet ken panagsapul iti trabaho dagiti Pilipino.
Karaman dayta iti House Bill 8191 wenno gakat a Ginhawa sa Kuryente Act, a gagem a pagbalinen nga otomatiko a lifetime rate para kadagiti marigrigat a pamilia.
Iti salinong ti gakat ket maikkan ti 50% a diskwento iti singir ti kuryente dagiti pagtaengan nga adda iti minimum wage earner.
Karaman pay iti GINHAWA KIT iti House Bill 8192 wenno Ginhawa sa Paghahanap ng Trabaho Act a mangamyendar iti Republic Act 11261 tapno pagbalinen a simple ken standardized dagiti requirement iti trabaho.
Maibasar iti gakat, maiparit pay iti panagsingit kadagiti orihinal a dokumento ken doble-doble a clearance.
Idurduron met ti House Resolution 823 nga adalen ti nangina ken nabuntog a koneksyon iti internet iti pagilian tapno mapalaka ti presyona ken mapalawa ti access kangrunaan kadagiti adayo a lugar iti Pilipinas.
