Mapapati nga adu a polis iti kayatna iti agsarita maipanggep iti kapadasanda iti nadara a drug war idi panawen ni dati a Pres. Rodrigo Duterte kas maibasar iti kabarbaro nga EJK Truth Commission.
Inlawlawag ni EJK Truth Commission Executive Director Carlos Conde, sakbay pay a naidatag ti independent body ket addan dagiti polis iti nagsarita iti kinasagana ken kalikagumda a makaibingay iti kapadasanda.
Kinunana a saan idi a maliklikan a suroten lattan dagiti polis ti bilin ti national headquarters uray saanda a kayat.
Mapapati nga awan iti gundaway dagiti polis idi nga agsarita wenno agreklamo kontra iti sistema ken organisasyon a nakairamananda ta nainget iti panangsurotda iti chain of command.
Segun ken ni Conde, kayat ti Truth Commission nga agbalin a venue tapno mairuar dagiti polis ti kapadasanda ken trauma iti nadara nga operasyon ken nagbalin nga epektona iti intero a kinataoda.
Kayat pay ti grupo a maawatan no ania iti kapanunotan dagiti polis idi bayat iti panangisayangkatda kadagiti operasyon a nagresulta iti rinibo a natay.
Ingkari ti grupo a salaknibanda iti kinatao dagiti polis ken saan a maapektaran iti agtultuloy a panagserbida.
