Umabot iti innem a pulo a million downloads, nasurok 900 million transaction, ken 1,323 integrated government systems ti nairekord ti eGovPH super app kas pinasingkedan ti Department of Information and Communications Technology (DICT).
Dayta iti pinasingkedan ni DICT Undersecretary for eGovernment David Almirol Jr. ken kinunana a nairekord pay ti eGovPH ti 700% a panangpangato ti panagaramat ti aplikasion.
Dayta ket kagiddan ti agtultuloy a panangiduron ti DICT ken kadagiti katinnulong nga ahensia ti digital transformation dagiti serbisyo iti gobierno.
Segun ken ni Almirol, ti eGovPH super app ket maysa laeng kadagiti duapulo ket walo a digital platforms a nabukel iti pannakitinnulong iti agduduma nga ahensia iti gobierno.
Kinuna ti opisyal a kaykayatda a tutukan ti panangpasayaat dagiti serbisyo ngem iti panangpatol kadagiti riri ken babalaw kontra kadagiti programada.
Aminado ni Almirol a sakbay a simrek iti gobierno ket maysa isuna kadagiti nagreklamo a nabuntog ken komplikado a proseso dagiti transaksion kadagiti ahensia iti gobierno.
