Imbes a maikkat ti Senior High School program iti K-to-12 education, idurduron ti Senate Committee on Basic Education a pagbalinen a dua wenno tallo laengen a tawen ti panagadal iti kolehio.
Patien ti komite nga adu a subject ti maad-adal iti Senior High School ngem ul-uliten laeng dagiti estudiante no addadan iti kolehio isu a masaysayang ti mano tawen a panagadalda.
Impaganetget ti komite nga agpatang laengen ti Department of Education ken Commission on Higher Education tapno maibasbassit ti panagadal dagiti estudiante iti kolehio imbes a busbusenda ti uppat agingga lima a tawen tapno makaturpos iti kurso.
No bilang ta saan nga agtignay ti DepEd ken CHED iti gakat, ipila dagiti senador ti maysa pay a gakat iti 20th Congress tapno pagbalinen a dua wenno tallo a tawen laengen ti panagadal iti kolehio.
Immunan nga induron ni Senate President Pro Tempore Jinggoy Estrada a maikkat ti Senior High School iti K-12 ta awan met serbina kadagiti estudiante.
