Agpada a naipaagas iti ospital dagiti dua a nagmaneho iti motorsiklo gapu iti panagdinnungparda iti provincial road idiay Barangay Baballasioan, Sta. Maria, Ilocos Sur iti alas sais kuarentay uno iti malem idi kalman, May 2, 2025.
Ti nagmaneho ti Honda Wave 110 motorcycle ket ni Romeo Agustin Macasiray, agtawen iti pitopulo, naasawaan, mannalon nga agnaed idiay Barangay Baballasioan, Sta. Maria idinto a ti nagmaneho ti Motorstar 125 motorcycle ket ni Venson Manglimot Casabar, agtawen iti tallopulo ket uppat, naasawaan nga agnaed idiay Barangay Gusing, Sta. Maria.
Agpapalaud a direksyon ti Honda wave ket idi nadanonna iti sharp curve portion iti kalsada, inovertake-anna dagiti dua a motorsiklo iti sangona ngem nag-overshoot ket naidungpar iti sumungad a Motorstar 125 a naggapu iti bangir a direksyon ken naidungpar iti road pavement.
Gapu dayta ket naipan dagiti dua iti Ilocos Sur District – Narvacan para iti pannakatamingda ket na-admit ti nagmaneho ti Honda Wave para iti nayon a medical attention.
