VIGAN CITY – Kaso a reckless imprudence resulting to double homicide ken damage to property ti sangwen ti nagmaneho ti trak a ni Wilfredo Hementera nga agnaed iti San Juan Accfa, Cabanatuan, Nueva Ecija ta nadungparna ti traysikel a nagluganan dagiti agassawa idiay Vical, Sta. Lucia.
Nabigbig dagiti biktima a da Romeo Salas, agtawen ti limapulo ket pito ken ni Maximina Salas, agtawen ti uppat a pulo ket siam nga aganed iti Bangar, La Union.
Iti pannaki-uman ti Bombo Radyo Vigan ken ni Pol. Capt. Leonilo Ancheta, hepe ti Sta. Lucia Municipal Police Station, agpapa-abagatan a direksion ti traysikel a naggapu idiay Candon City ta napanda naglako idin ta dinungpar ti trak a napaspas ti tarayna ket nadungparna dagiti biktima.
Gapu iti kapigsa ti dinnungpar, napitpit ti traysikel a nagluganan dagiti biktima a nagsagaba ti nakaro a dunor ti nadumaduma a paset ti bagida a puon ti nakatayanda idin a ti trak ket napittak iti sangwanan a pasetna.
Malaksid iti dayta, pinasingkedan ni Ancheta nga accident prone area iti nakapasamakan ti aksidente isu a nagballaag kadagiti amin nga agmanmaneho nga agannad tapno maliklikan ti aksidente.
