VIGAN CITY – Dead on Arrival ti maysa a lalaki gapo ta aksidente a nadungpar ti Toyota Hi-Ace Van iti National Highway ti Baranagay San Nicolas, San Esteban.
Iti panniki-uman ti Bombo Radio Vigan kenni PMajor Aurelio Manantan ti San Esteban Municipal Police Station, nabigbig ti nagmaneho ti Van a ni Cesar Aron Secretario, ag-tawen ti uppat a pulo ket walo, baro, residente ti Marikina City, idinto iti nagmaneho met iti motosiklo a Yamaha Sniper , agmaris ti Blue ken Black ket ni Christian Lunugan, ag-tawen ti dua pulo, baro, agnanaed ti Barangay Lucaban, Burgos.
Segun kenni Manantan, agpapaamianan a paset ti kalsada ti Van , idinto nga agpapaabagatan iti bangir a kalsada ti Motorsiko idi nadanun da iti kurbaan a parte ti kalsada , inovertake ti Van ti saan pay nabigbig a lugan, a gapuanan iti panagsinnabat da iti nakamotorsiklo.
Innayon ni Manantan a basol ti naka-van ti napasamak gapu ta nag-overtake isuna ti kurbaan.
Naipan iti Ilocos Sur District Hospital ti nakamotorsiklo gapu ti sinagaba na a dunor ti naduma-duma a paset ti bagi na ngem naideklara a dead on arrival idinto nga awan iti sinagaba a dunor iti driver ti Van, ngem dagiti pasaherona a dua a nabigbig nga isuda Jhannel Corpus ken Lorna Antiporda ket nadangran.
Nagballaag ni Aurelio kadagiti umili a siguradwenda nga ammoda ti direksion a papanan da, ken kanayon met nga isuot dagiti naka-motorsiklo ti safety gear para iti nataltalged a panagbiahe.
