Agpapatulong iti media ni Department of Justice Acting Secretary Fredderick Vida tapno lawagan dagiti madi a kapanunutan iti publiko kadagiti legal nga addang nga ar-aramiden iti dadduma nga ahensya iti gobierno kangrunaan iti napasamak a panagserbi ti warrant of arrest iti pagtaengan ni dati a Congressman Zaldy Co, uray ammoda nga awan ditoy pagilian.
Inlawlawag ni Vida a husto ken awan ti panaglabsing ti proseso iti inaramid dagiti otoridad iti panagserbi iti arrest warrant uray awan ti akusado ta kasapulan latta nga isubli kadagiti polis ti nasao a warrant iti korte kas maibasar iti resulta iti operasyonda.
Kinunana a no nakemmeg ti maysa nga akusado ket maisubli iti korte tapno aggaraw iti kaso ngem no napaay a kas iti napasamak ken ni Co ket maibilangen a pugante.
Impaganetget ni Vida a ti nasao nga addang ket napateg tapno makaisayangkat iti agduduma nga ahensya iti gobierno iti sumaruno a legal a proseso.
