Kinumpirmaran ti Department of Justice (DOJ) a nagkiddawdan ti tulong ti Japanese government para ti pannakaisayangkat ti DNA testing iti tulang a narekubre idi kallabes iti Taal Lake.
Patien gamin dagiti otoridad a dagiti nasao a tulang ket kukua dagiti napukaw a mannadi.
Segun ken ni Justice Assistant Secretary Atty. Mico Clavano, maawatan ti DOJ ti karit iti DNA-testing capacities isu a kiniddawda ti pannakitinnulong ti Japanese government para ti testing a maisayangkat kadagiti tulang a nasarakan.
Dayta ket kalpasan a kinuna ti local forensic teams a saanda a maka-extract ti viable DNA profile manipod specimen.
Impaganetget ti ahensya a kalikagum ti Marcos Administration a maipaaay ti hustisya kadagiti nasao a napukaw a mannadi.
Idi napan a bulan ket nasarakan iti Taal Lake dagiti tulang a mapapati a nagtaud ti tao kalpasan nga adda iti pakaammo a dagiti dadduma a missing sabungero ket naipan iti dan-aw.
