Mangipila ti reklamo ti Philippine National Police – Criminal Investigation and Detection Group (PNP-CIDG) kontra ken ni Sen. Robin Padilla ken dadduma pay gapu iti mapapati a panangtulongna ken ni Senador Ronald “Bato” dela Rosa tapno makalibas.
Segun ti CIDG, iref-refer-da iti National Prosecution Service iti Department of Justice (DOJ) ti reklamo para iti mapapati a panaglabsing iti Presidential Decree No. 1829 wenno obstruction of justice.
Kinuna ti ahensya a ti panangilugan ni Padilla ken ni dela Rosa ket saan laeng a simple a “hitch ride” no diketdi maysa a highly coordinated, pre-planned logistical maneuver tapno mapapati a saan a madetect bayat nga agliblibas a rumuar iti premises iti Senado idi May 14.
Rimmuar pay iti imbestigasyon nga adda pay maysa a lugan ti simmurot iti lugan ni Padilla a mapapati a nagserbi a security escort ken backup car iti nasao a maneuver.
Inlawlawag ti CIDG a ti pangipila iti reklamo ket kasaruno ti mandato nga imbestigaran dagiti krimen ken ipatungpal ti linteg a patas ken awan ti kankanunonganda.
