Impasigurado ti Department of Health a makanay pay laeng ti suplay ti agas iti pagilian kabayatan nga agtultuloy ti pannakamonitor ti presiona gapu iti krisis iti langis gapu iti riribuk iti Middle East.
Segun ken ni Health Secretary Ted Herbosa, gapu iti panagpangina ti gastos iti produksion ken logistics ket posible a ngumina ti presio ti agas ken dadduma pay a produkto kadagiti sumaruno a panawen nangruna ta adu kadagiti medical supply ti maangkat pay laeng iti sabali a pagilian.
Pinasingkedan ti DOH nga adda nakasagana nga stockpile ti agas para kadagiti ospital ken publiko isu nga awan ti manamnama a pagkuranganna.
Uray no manamnama a ngumato ti gastos dagiti umili kadagiti resetada, impasigurado ti DOH nga agtultuloy ti serbisio a para iti salun-at iti pagilian.
