Papigsaaen ti Department of Transportation (DOTr) ti pannakaipatungpal dagiti maritime safety rules tapno malapdan ti panagbiahe dagiti barko a saan a natalged ti kasasaadna ken panangisakay ti ad-adu ngem ti umiso a kapasidad.
Nakipagkita ni DOTr Secretary Vince Dizon kadagiti maseknan nga ahensia, pakairamanan ti Philippine Ports Authority (PPA), Maritime Industry Authority (MARINA) ken Philippine Coast Guard (PCG), tapno pagsaritaanda ti naing-inget a pannakaipatungpal dagiti pagannurotan ken pannakasungbat dagiti aglabsing.
Inusig met ni Dizon, kaduana ni PPA General Manager Jay Santiago ti Manila North Port tapno masigurado ti kinasagana ti sangladan para iti panagakar dagiti agbibiahe iti daytoy nga Undas, partikular dagiti agbiahe iti Visayas ken Mindanao.
Imbilin ni Dizon a maipangpangruna ti pagimbagan dagiti pasahero, karaman ti panangipalubos kadagiti senior citizen a nasapa a sumangpet iti sangladan a sumrek iti air-conditioned waiting area bayat ti panagur-urayda iti panagbiaheda.
