Dumanon iti 1,026,049 ti bilang dagiti pasahero a limmasat iti nadumaduma a sangladan iti intero a pagilian manipud Oktubre 27 agingga alas 8 ti bigat idi Nobiembre 1, segun iti Philippine Ports Authority (PPA).
Ti kangatuan a bilang dagiti pasahero ket nairekord idi Sabado, a dimmanon iti 245,718, a sinaruno ti 222,874 idi Biernes, bayat a 36,753 ti nairekord idi Domingo.
Namnamaen ti PPA a dumanon iti nasurok a 1.9-M ti dagup a bilang dagiti pasahero manipud Oktubre 27 agingga Nobiembre 5, nangatngato ngem iti 1,905,063 a naipakpakauna idi napan a tawen.
Kabayatanna, imbilin ti Department of Transportation (DOTr) ti pannakaipatungpal ti 24-hour ticketing system iti Manila North Port tapno matulongan dagiti pasahero a sumangpet uray naladaw ti rabii tapno dagus a makaala iti tickets para iti panagbiaheda.
