Inamin ti Department of Education (DepEd) nga agkurang ti bilang dagiti rehistrado a guidance counselor kadagiti pampubliko a pagadalan.
Segun ken ni Assistant Secretary for Operations Joyce Andaya, limaribo a Plantilla items iti nakailatang ngem nasurok 1,000 laeng iti naipan para iti nasurok 40,000 a pagadalan iti pagilian.
Maibasar iti Guidance and Counseling Act of 2004 (Republic Act 9258), kasapulan ti bachelor’s degree ken master’s degree iti guidance ken counseling wenno mainaig ti disiplina sakbay a maala ti lisensya kas guidance counselor.
Iti agdama ket P40,000 agingga P50,000 ti entry-level salary para iti posisyon.
Maipalagip nga impaganetget ni President Ferdinand Marcos Jr. iti State of the Nation Address-na a kasapulan ti nayon a guidance counselor tapno makatulong kadagiti estudyante a makapaspasar iti depression ken bullying.
