Inlawlawag ni dati a Barangay Captain Antonio Cachero Delos Santos iti Laslasong West, Sta. Maria, Ilocos Sur a saan a nasurot ti kiddawda a plano para iti flood control project iti karayan isu a nadaras a nadadael.
Iti pannaki-uman ti Bombo Radyo Vigan ken ni Delos Santos, kayatda koma nga agilad ti langa ti semento a maikabil, saan a patas a kas ti plano dagiti kontraktor.
Patien ti dati a kapitan a no kasta koma ti nasurot ket mabalin a saan koma pay laeng a nadadael ti nasao a flood control project.
Malaksid dayta, inlawlawagna pay a pinirmaanna ti certificate of completion ti proyekto ta kinuna idi dagiti kontratista nga adda nailatangen a pondo ket narugianen ti pannakaaramidna.
Kunana pay a nalpas idin ti proyekto, ngem isu met ti gundaway a pannakarebbana gapu kadagiti nagsasaruno a bagyo.
Kiddawna kadagiti kontratista a no adda dagiti kastoy a proyekto ket nasken koma met a denggenda ti singasing dagiti maseknan iti barangay, saan a tay surotenda lattan no ania ti nakaplano.
