Impatangken ti Philippine National Police – Criminal Investigation and Detection Group (PNP-CIDG) nga adda iggemda a warrant of arrest idi insayangkatda ti search operations kontra ken ni Senador Ronald “Bato” dela Rosa.
Impaganetget ni CIDG Director Robert Alexander Morico II a nakasaganada a mangipakita ti warrant no kasapulan.
Kinumpirmaran pay ni Morico a ti iggemda a bilin a panagkemmeg ket nagtaud iti International Criminal Court (ICC).
Kinuna pay ti CIDG Director, napalaus iti pannakikammayet dagiti lokal nga opisyal ken dagiti akin-kukua iti pagtaengan.
Nagsarita ti CIDG chief kalpasan nga impakaammo ni Nancy dela Rosa nga asawa ti senador ti post ti maysa a pagayam a mangkukwestyon iti panagserrek dagiti otoridad kadagiti pribado a sanikua nga awan iti warrant-na.
Idi nasaludsod ti joint operatives iti CIDG ken National Bureau of Investigation (NBI) no adda warrant-da ket mapapati a simmungbatda a saanen a kasapulan.
Kinuna ni Morico a respetoenna ni Nancy ken maawatanna iti emosyonna.
