Nagsagaba ti minor injuries ti nagmaneho ti CRV kalpasan a naidungpar iti poste ken pader idiay Barangay Guimod, Bantay, Ilocos Sur idi rabii, February 18, 2026.
Ti nagmaneho ti Honda CRV ket lalaki nga agtawen iti duapulo ket uppat, baro, collector iti bangko, holder iti driver’s license nga agnaed idiay Padu Chico, Sto. Domingo.
Iti pannaki-uman ti Bombo Radyo Vigan ken ni PCpt. Donaldson Pagalanan nga ACOP iti Bantay Municipal Police Station, agpapaamianan a direksyon ti CRV idin nadanon iti nasao a lugar ket naawanan ti kontrol ti manibela ti driver a mapapati a naka-inom iti arak isu a napan iti bangir a linya ken nagderetso iti poste ken pader iti maysa a pagtaengan.
Gapu ti dunor a sinagabana ket naipan iti Northside Doctors Hospital, Guimod, Bantay para iti pannakatamingna.
Addan ti inisyal a panagsartita ti driver ti CRV ken ti akin-kukua iti nadungparna a pader para iti magastos iti pannakaipasimpa ti nasao a paset.
