VIGAN CITY- Saan a tiniketan ti Vigan City Police Station ni Engr. Rowell Castro Laurente nga agtawen iti tallo pulo ket siyam, naasawaan ken agnaed idiay Poblacion East, San Ildefonso gapu iti panagmaneho na a nakainom idi rabii ti June 12 a poon iti nangdarusdusan na iti maysa a N-Max a minaneho ni Rennel Arce Bermudez ti Capangpangan, Vigan City; maysa a raider 150 a minaneho ni Ronnel Atinaja ti Naguilian, Caoayan ken tricycle ni Marthel Mendoza ti Tamag, Vigan City.
Segun ti impormasyon, saan a mabalin nga agticket dagiti pulis ta saan da nga authorize ken saan met a nagipila iti kaso dagiti biktima ngem nu kuma nagipila da, iyendorso ti Vigan City police iti Land Transportation Office ti pannakaticket ni Laurente gapu ti panagmaneho na a nakainom.
Idi met laeng rabii ti June 12, nagpapatang da Laurente ken dagiti akin-kukua dagiti dinarusdos na a lugan nga isuna iti mangbaklay kadagiti amin a gastos da iti panagpasimpa da kadagiti nadadael a lugan da.
Kabayatanna, pinasingkedan ni Police Capt. Christopher Ramat, hepe ti Sto. Domingo municipal police station a nasalamaan da ni Laurente idi nai-flash alarm kadakuada iti napasamak ditoy syudad ti Vigan.
Segun ken ni Ramat, idi pinara da ti nagluganan ni Laurente a pick up ket saan a nagsardeng isu a kinamat da agingga idiay Parada, Magsingal ket napaneknekan da a nakainom a nagmaneho ti suspek.
