Kiniddaw ti Catholic Bishops’ Conference of the Philippines (CBCP) iti publiko a liklikan nga ikampania ni Luis Antonio Cardinal Tagle nga agbalin a sumaruno a Santo Papa.
Segun ken ni CBCP Episcopal Commission on Public Affairs executive secretary Fr. Jerome Secillano, saana rumbeng nga iduron dagiti tattao ni Cardinal Tagle kas sumaruno a Santo papa ta amangan nu panunoten iti dadduma a naimpluwensyaan ti conclave nu kas bilang isuana ti mapili.
Impaganetgetna a rumbeng a mairespeto ti waya-waya dagiti elector isu a ti rumbeng laeng nga aramiden iti publiko ket iti panangikararag ken ni Cardinal Tagle ken kadagiti dadduma pay a cardinal electors.
Immunan a naipakaammo a karaman ni Tagle nga agtawen iti innem a pulo ket pito, Pro-Prefect iti Dicastery for Evangelization a maysa kadagiti papabili wenno contender nga agbalin a shepherd iti 1.4 billion a Katoliko iti intero a lubong.
Naawagan pay ni Tagle nga Asian Pope Francis.
Apaman a maitabon ni Pope Francis inton Sabado ket agkakadua dagiti cardinal nga agtawen iti walopulo agpababa para ti conclave ken agbotos iti sumaruno a Santo papa.
Tallo iti cardinal-electors iti pagilian nga isu ni Tagle, Pablo Virgilio Cardinal David iti Kalookan, ken Jose Cardinal Advincula iti Manila.
