VIGAN CITY – Adda dagiti exhibitors a saan a nakipaset iti Binatbatan Food and Trade Fair ti Vigan City itatta a tawen idiay Vigan City Public Market Annex wennu asideg ti Vigan Convention Center gapu iti posible a panagamak da kadagiti nagsasaruno a gingined itay kallabes.
Malaksid laeng dayta iti umadanin nga eleksyon ta adda dagiti exhibitors a mapan sumur-surot nga agkamkampanya para kadagiti supsuportaran da a kandidato.
Uray pay kasta, segun ken ni Hermie Etrata, cooperative officer ti Vigan City, nu bimmassit iti bilang dagiti nagpalista itatta a tawen ket saan met unay a dakkel iti epekto na ta adu met latta dagiti nakipaset nga exhibitors.
Ti nasao a food and trade fair ket pormal a naglukat itatta nga aldaw, April 27 ket agpaot agingga inton May 5 kagiddan dagiti aktibidad iti syudad ti Vigan inaig iti nasao a parambak.
