Nasayaaten ti kasasaad ti maysa a baro manipod ili ti San Juan kalpasan ti panagbekkelna.
Iti pannaki-uman ti Bombo Radyo Vigan ken ni PLt. Reynald Ramos manipod San Juan Municipal Police Station, alas onse iti rabii idi October 18 ket simmangpet a naka-inom iti nasanger ti menor de edad nga agtawen iti sangapulo ket pito nga agnaed idiay Barangay Muraya, San Juan idin kiniddawna ti inana nga iluto ti ikan nga inyawidna a naggapu iti nobyana.
Segun ken ni Ramos, gapu ta rabiin ken awan ti pagrekado ti inana ket imbagana iti baro nga ipabigatda laengen ngem nasair isu a nagsinnungbatda ket gapu iti sakit ti nakem ti baro, pimmanaw iti pagtaenganda.
Iti ipapanaw ti baro ket saan a maka-igna ti inana isu a sinurotna idi dimmalyasat iti waig nga isu metten iti pannakakitana iti panagbekkel ti baro iti kayo ti acacia babaen iti tali.
Insigida a nagpaarayat ti ina isu a naibaba ti baro ket naipan iti Pira Clinic and Hospital, Cabugao agingga a naiyakar iti Mariano Marcos Memorial Hospital and Medical Center, Batac City, Ilocos Norte para iti pannakatamingna isu nga iti agdama ket nasayaaten ti kasasaadna.
Palagip ni Ramos kadagiti agtutubo a nu adda parikot a sangsangwen ket nasaysayaat nga agkiddaw iti tulong tapno saan a madangran ti bagi ken saan a mapanunot a kettelen ti bukod a biag.
VIDEO AUDIO – PLT. REYNALD RAMOS
