VIGAN CITY – Maimasayag ton idiay Barangay Quimmarayan, Bantay iti bangkay ti Overseas Filipino Worker a natay idiay Saudi Arabia gapu ti brain aneurysm.
Dayta ket agsipud ta inton rabii ket manamnama nga agdisson ton idiay Laoag International Airport iti eroplano a nakailuganan iti bangkay ni Maribel Patubo nga isunto iti pangsabatan dagiti kameng iti pamilya na.
Immun-unan a nadakamat ni Romella Bayatin, ti chief nurse idiay Dammam, Saudi Arabia a maysa kadagiti timmulong iti pannakaiyawid iti bangkay ni Maribel ditoy probinsiya babaen iti pannakikinnammayet ti Bombo Radyo Vigan a manipud iti airport idiay Saudi Arabia, agdisso iti eroplano a nakailuganan iti bangkay ni Maribel idiay Ninoy Aquino International Airport sakbay a maibiyahe manen a maipan idiay Laoag International Airport.
Inlawlawag ni Bayatin nga atiddog iti proseso iti panangiyawid iti bangkay ti OFW ngem gapu kadagiti koneksyon iti grupo na ken koneksyon na iti opisina ti Overseas Workers’ Welfare Administration, nadaras laeng iti pannakaiyawid iti bangkay ni Maribel a natay idi October.
Agsipud iti dayta, napalaus iti panagyaman ni Joseph Patubo kadagiti amin a timmulong kenkuana tapnu maiyawiden iti bangkay ti asawa na ken maikkan iti disente a pannakaimasayag ken pannakaitabon.
Naulila ni Maribel ti asawa ken dua nga annak na.
