Inamin ti Department of the Interior and Local Government (DILG) a maysa kadagiti rason ti pannaka-ikkat ni Police General Nicolas Torre III kas PNP chief ket ti panangipatungpalna ti balasaan iti organisasyon.
Idi nasaludsod ni DILG Secretary Jonvic Remulla nu adda kainaigan ti reshuffle iti pannaka-ikkat ni Torre ket kinuna ti secretary a karaman dayta kadagiti inkonsiderar ni Pres. Ferdinand Marcos Jr.
Segun ken ni Remulla, narigat iti nagbalin a pangngeddeng ti presidente ngem kasapukan ta naaramid ti nasao a banag gapu ti national interest.
Immunan a binilin ti National Police Commission (NAPOLCOM) ni Torre nga ibabawi iti impatungpalna a reassignment kadagiti dadduma nga opisyal iti kapulisan.
Ti balasaan ket maar-aramid kadagiti nangangato nga opisyal pakairamanan ni Lt. Gen. Jose Melencio Nartatez Jr. a second command iti PNP nga in-reassign ni Torre idiay Mindanao.
Ni Nartatez iti nadutokan nga agbalin nga Officer-in-Charge iti PNP.
