Nangisayangkat iti addang dagiti agpampanday linteg ti Bangsamoro Autonomous Region in Muslim Mindanao (BARMM) tapno iduron dagiti kongkreto a reporma iti edukasyon kalpasan ti joint oversight hearing a mangtratar iti learning recovery programs, transition ti workforce, ken resulta dagiti panagadal ti sektor iti edukasyon.
Segun kadagiti miembro ti Bangsamoro Transition Authority (BTA), sumagmamano nga isyu ken karit iti Ministry of Basic, Higher and Technical Education (MBHTE) ti naipagentget iti public hearing.
Iti joint hearing ti BTA Committee on Basic, Higher and Technical Education ken Committee on Finance, Budget and Management, natratar dagiti kangrunaan a parikot ken kasapulan nga intervention tapno mapasayaat ti kalidad ti edukasyon iti BARMM.
Dinakamat dagiti agpampanday linteg ti report ti Second Congressional Commission on Education (EDCOM II), a mangibagbaga a kasapulan nga ikaskaso ti nutrisyon, early childhood care and development, learning recovery ken foundational literacy.
Adda 34.4% stunting rate iti BARMM, 16.9% anemia prevalence, ken 48.2% household food insecurity, a mabalin a mangapektar iti kabaelan dagiti ubbing iti panagadal.
Karaman pay ti programa a naipresentar ti “Bawat Bata sa Bangsamoro ay Bumabasa at Bumibilang” (5Bs), maysa a literacy ken numeracy initiative para iti panagdur-as ti foundational learning outcomes.
