Pinasingkedan ti Philippine Drug Enforcement Agency (PDEA) nga adda ebidensiada a mangisilpo iti dati a kameng ti Parlamento ti BARMM a ni Sultan Edrieza Nasser Rimbang iti mapapati a panagplano wenno panagpinansia iti gandat a panagipuslit iti P3.5-B a gatad ti shabu manipud Laos.
Segun kenni PDEA spokesperson Atty. Joseph Frederick Calulut, daytoy ti sungbat ti ahensia kalpasan a pinaglibakan ni Rimbang ti alegasion nga isu ti adda iti likudan ti nadakamat a pannakaipatulod ti droga.
Indagadag ti PDEA ni Rimbang nga agparang iti opisinada wenno iti Criminal Investigation and Detection Group (CIDG) tapno itedna ti statement-na.
Segun ken ni Calulut, napaayaban ni Rimbang babaen ti subpoena ngem pinilina ti nangiruar iti statement iti social media, bayat nga agtaltalinaed pay laeng a person of interest iti imbestigasion.
