VIGAN CITY – Maysa kadagiti tallo a mangisursuro a napili a mangibagi ti pagilian ni Maria Concepcion Iglesias, AssPrincipal II ti Narvacan National Central High School iti Asia-Europe Foundation Classroom Network School Collaboration 2020 a ti temana ket Well Being of Teachers, Students and Parents.
Iti pannaki-uman ti Bombo Radyo Vigan ken ni Iglesias, duapulo a mangisursuro manipud kadagiti nadumaduma a pagilian ti napili a makipaset iti programa ket dakkel a gundaway kenkuana a makaadal kadagiti banag a makatulong kadagiti padana a mangisursuro ita a panawen ti Covid19 pandemic ta dagiti pagsentroan ti diskusyon iti well being, mental health ken parent-teacher collaboration.
Agpaot iti tallo a bulan ti programa a narugian idi October 13 nga isu ti umuna a taripnongda babaen iti online conferencing ken malpas inton December 22.
Paset ti programa ti panangbukelda ti inisyatibo wenno aniaman a proyekto a maipatungpalto iti pagadalan nga ayanda a mangtulong kadagiti padana a mangisursuro ken estudiante.
Kabayatanna, dagiti dua pay a napili a mangibagi iti pagilian ket da Floriedes Anda – Special Science Teacher ken Mental Health Committee Chairperson ti Philippine Science High School, Quezon City ken ni Jan Casuncad – Head Teacher III ti Science and Technology Department ti Don Ramon E. Costales Memorial National High School Pangasinan Division II.
