Kinumpirmaran ti gobierno iti Timor-Leste mapaawiden ditoy Pilipinas ti naikkat a kongresista a ni Arnolfo Teves Jr.
Segun ti Timor-Leste government, ti presensya ni Teves ket mangirepresentar ti seryoso ken saan a kaawat-awat a sitwasyon.
Dayta pay ti mangdadael ti bilateral relations iti nagbaetan iti dua a pagilian.
Kinunana a naaddaan iti saan a napintas nga imahe ti Timor-Leste ta isun ti pappapanan dagiti tattao a mangtartaray iti hustisya a mangdadael ti integridad kadagiti border ken ti pananglabanda iti transnational crimes.
Ti pangngeddeng ti Timor-Leste government a pasublien ni Teves iti Pilipinas ket administrative case ti Ministry of Interior ta awan ti husto a legal nga authorization ni Teves kalpasan a nakanselar ti passport-da.
Innayon ti gobierno ti Timor-Leste a gapu iti naaramid a krimen ni Teves iti Pilipinas ket maparitanen a sumrek iti pagilianda iti sangapulo a tawen kas maibasar ti migration ken asylum law.
Maipalagip a maitudtudo a mastermind ni Teves iti pannakatay ken ni daydi Negros Oriental Governor Roel Degamo ken maitudtudo nga adda iti likodan dagiti krimen iti nasao a lugar.
