Inyatiddog ti Department of Finance (DOF) ti validity ti importer accreditation manipod maysa tawen a nagbalin a tallo a tawen kagiddan ti panagkissay iti pakabuklan a bayad tapno mapadaras ti trading iti pagilian.
Iti salinong ti baro a patakaran a naipatungpal babaen ti Bureau of Customs (BOC), agbalin a tallo a tawen ti bisa ti accreditation dagiti importer imbes a tinawen a renewal.
Kagiddan dayta, naibaba pay ti bayad manipod P2,000 kada tawen wenno pakabuklan a P6,000 iti uneg iti tallo a tawen, a nagbalin a one-time payment a P5,000 para iti isu met la a panawen.
Iti baet a napaut a validity, kasapulan latta nga agipasa ti Annual Reportorial Compliance (ARC) dagiti importer iti uneg iti tallopulo nga aldaw manipod anibersaryo iti accreditation-na tapno masigurado ti agtultuloy a panangsurot iti regulasyon.
