Kaso a concubinage ken adultery ti posible a sangwen dagiti aguliteg a naduktalan nga agkarelasyon iti ili ti Sto. Domingo, Ilocos Sur.
Dagiti biktima nga asawada, ket ti babai nga agtawen iti uppat a pulo ket maysa, self-employed nga agnaed idiay Sto. Domingo ken ti lalaki nga asawa ti kaanakan ti babai a biktima ket agtawen iti tallopulo ket uppat, construction worker nga agnaed idiay Magsingal.
Ti suspek a lalaki ket agtawen iti uppat a pulo ket dua nga agnaed idiay Sto. Domingo ken ti kinamalalana a kaanakan ti asawana ket agtawen laeng iti duapulo ket walo, self-employed nga agnaed met laeng idiay Magsingal.
Sakbay ti pannakadiskubre iti saan a maiparbeng a relasyon dagiti suspek ket nagduduan dagiti biktima iti kinasinged iti tunggal maysa dagiti suspek nangruna idi agtrabtrabaho pay laeng nga OFW idiay Hong Kong idi 2023 ti biktima a babai.
Idi nakaawid ti babai a biktima ditoy pagilian idi October 20, 2024 ket napansinna ti kinasinged ti asawa ken kanakanna agingga naduktalanna nga umumyan ken agtaltalinaed ti kanakanna iti pagtaenganda ngem saanna nga inikkan ti malisya ta kabagyanna.
Idi February 21, 2025 iti alas singko trenta iti bigat ket nakita ti lalaki a biktima nga agbinbinnisito dagiti suspek iti kusina iti pagtaenganda idiay Magsingal isu a pinakaammoanna ti biktima a babai.
Kinumprontar ti biktima a babai ti asawana babaen ti panagtawagna iti cellphone ket inamin ti lalaki iti pannakikamalalana iti kaanakan ti asawana.
