Nagballaag ti Alliance of Concerned Teachers Philippines nga ad-adda a dumakkel ti utang dagiti mangisursuro no saan a maingato ti sueldoda.
Segun ken ni ACT Chairperson Ruby Bernardo, uray makagargari ti nabayag a loan terms, saanna daytoy a masulbar ti kangrunaan a pagtataudan ti parikut nga isu ti nababa a sueldo dagiti mangisursuro.
Kunana a mapilpilitan dagiti mangisursuro a kanayon nga umutang para iti inaldaw a gastosda ken tapno bayadanda dagiti utangda.
Dinakamatna pay a dagiti mangisursuro ket umut-utang saan a para iti luhoda, no di ket para iti taraon, abang, koriente, salun-at, edukasion dagiti annak, ken gastosda iti pagadalan.
Inallukoy ti ACT ti gobierno ken Kongreso nga itedda ti P50,000 nga starting salary para kadagiti public school teacher tapno saandan a mangnamnama iti pautang.
