--Ads--

Impaganetget ni Presidente Ferdinand Marcos Jr. ti kinapateg ti natibker a relasion, panagtalek ken panagkikinnaawatan kas pundasion ti agtultuloy a panagtitinnulong dagiti pagilian a kameng ti Association of Southeast Asian Nations (ASEAN).

Inlawlawag ti presidente ti konsepto ti mutuality kas panangbigbig iti gagangay a kinasiasino, kinatao ken panagtitinnulong ti tunggal maysa, no sadino a napateg a maawatan a nagsisilpo ti biag ken pagimbaganda.

Innayon ni Marcos a ti panagtitinnulong dagiti pagilian ket saan laeng nga agpannuray kadagiti opisial a katulagan ken dokumento no saan ketdi iti silulukat a komunikasion, ti kabaelan a dumngeg iti laksid dagiti saan a panagtutunos ken panagtalek a mangpapigsa iti relasionda.

Impaganetgetna pay a nupay agduduma ti pakasaritaan, interes ken arapaap ti tunggal pagilian iti ASEAN, saan a kalikaguman ti organisasion a baybay-anda ti bukodda a kinasiasino tapno magun-od ti panagkaykaysa.

-- ADVERTISEMENT --

Innayon pay ti Presidente nga iti agarup innem a dekada ti ASEAN, napaneknekan a makatulong ti talna dagiti kabangibang a pagilian iti bukodda a seguridad, idinto a ti shared development ket manglukat iti ad-adu a gundaway para iti tunggal pagilian.

Linagipna pay ti immuna nga ASEAN Summit idi 1976 sadiay Bali, Indonesia, a karaman ti amana, ni dati a Presidente Ferdinand Marcos Sr., kadagiti lima a lider nga immanamong a mangipasdek iti Treaty of Amity and Cooperation in Southeast Asia tapno mapatibker ti panagtitinnulong para iti kappia ken panagdur-as dagiti umili.