Pinasingkedan ti Malakanyang nga impasigurado ti Department of Trade and Industry (DTI) nga awan ti panagngato ti presio dagiti kangrunaan a tagilako ken prime commodities agingga Disiembre 31, 2026, kas maibasar iti pammilin ni Presidente Ferdinand Marcos Jr.
Segun kenni Palace Press Officer Claire Castro, agtalinaed a kas iti presio dagiti produkto a saklawen ti opisial a Suggested Retail Price (SRP) ti DTI.
Karaman ditoy ti 190 a produkto a nainget a bantayan ti ahensia ken agserbi a pangibasaran para kadagiti paglakwan ken konsyumer iti presio dagiti tagilako.
Pinasingkedan pay ti Malakanyang a saan a maapektaran ti suplay ti essential goods iti intero a pagilian, idinto a maiparang ti official SRP bulletin kadagiti supermarket ken groceries tapno agserbi a pangibasaran para iti publiko.
Agtultuloy met ti pannakitinnulong ti DTI kadagiti manufacturer ken aglaklako tapno masigurado ti umdas a suplay ken agtultuloy a pannakaited dagiti produkto.
Panggep pay ti nasao nga addang a pagtalinaeden a makabael ken natalged ti presio dagiti kangrunaan a tagilako iti intero a pagilian.
