Dua ti nadangran iti napasamak nga aksidente a nakairamanan ti dua a lugan ken maysa a bisikleta idiay Barangay Sagat, Sta. Cruz.
Ti nagmaneho ti Suzuki Smash motorcycle ket agtawen iti limapulo ket innem, residente ti Barangay Baraka, Bangar, La Union.
Ti met nagmaneho ti Hi-ace Commuter Van ket agtawen iti uppat a pulo ket lima, residente ti Barangay San Jose, Sudipen, La Union.
Kabayatanna, ti nagmaneho ti bisikleta ket agtawen iti pitopulo ket innem, residente ti Barangay Poblacion Sur, Sta. Cruz.
Iti pannakiuman ti Bombo Radyo Vigan kenni PLT Marvin Laroya, Deputy Chief of Police ti Sta. Cruz Municipal Police Station, pinasingkedanna nga agturong iti bagatan a direksion ti nag-bisikleta iti west shoulder ket idi nadanon da ti nakapasamakan ti insidente, aksidente a nadungpar ti sumarsaruno a motorsiklo ti bisikleta nga agturong met laeng iti isu a direksion.
Natulid dagiti dua iti kalsada ken naguyas ti motorsiklo isu a nadungparna ti naka-parking a van.
Gapu dayta, nagsagaba ti dunor iti agduduma a paset ti bagi ti nagmaneho ti motorsiklo ken bisikleta nga agpada a naipan iti balay pagagasan para ti naan-anay a pannakatamingda.
Saan met a naan-ano ti nagmaneho ti van iti napasamak nga aksidente.
