Ipariten ti maysa a pagadalan idiay Pangasinan ti panagaramat ti sarita nga “esmiringhoy” ken dadduma pay a kapasda a sarita iti uneg ti campus, dagiti official school event ken online platforms a konektado iti pagadalan.
Iti anunsiyo ti Supreme Secondary Learner Government (SSLG) ti Bani East Integrated School, karaman pay iti maiparit a sarita ti “esmeringer,” “jerjer,” “espekikay” ken “bembang.”
Segun iti SSLG, gagem daytoy nga addang nga itandudo ti naannad a panagsarita, respeto, ken nasayaat a galad iti uneg ti pagadalan.
Nagpalagip ti skwelaan kadagiti estudyante a saan nga aramiden nga angaw dagiti sarita nga adda kastuy a kayat na a sawen, kangrunaan no saan a maitunos nga aramaten iti pagadalan.
Maibilang nga harassment ti panagaramat kadagiti nasao a sarita iti pada nga estudyante ken dadduma pay nga opisial ti pagadalan.
