VIGAN CITY – Awan foul play iti pannakatay ni Angel Tamayo, agtawen iti walo pulo ket walo, balo ken agnaed idiay Macatcatud, Magsingal ta patien dagiti kameng ti pamilya na a naatake ti biktima kabayatan iti panangsimsimpa na ti isim iti pagin-inanaan na a kubo.
Ti pannaki-uman ti Bombo Radyo Vigan ken ni PSInsp. Jason Morales, hepe ti Magsingal PNP, alas kwatro ti malem idi naminsan nga aldaw idi nakaawat da iti impormasyon nga adda iti nasarakan a bangkay iti rabaw ti isim iti maysa a kubo iti nasao a lugar.
Ngem idi napan da nagresponden, saan dan a nadanun ti biktima iti mismo nakapasagan na ta naipanen iti punerarya ngem iti panagimbestigar da, naamuan nga isimsimpa ti biktima iti nadadael a paset ti isim iti pagin-inanaan na a kubo ket saan na a kinayat iti bimmaba ti laksid nga ibagbaga ti putot a babai ti biktima nga umulogen ta nabara ti paniyempo ken tapnu mangaldaw dan.
Idi nagbalaw dagiti kabbalay na ta awan met laengen a mapasangpet da, napan da kinita iti ayan na nga agsimsimpa ket nakita da laengen ti biktima a nakaidda iti rabaw ti isim nga awanen iti biyag na ket patien da a naatake gapu ti kabara ti panawen a posible a napakaruwan ti mild stroke a sinagaba na idi.
