Nadunor ti maysa a babai kalpasan a binagsol ti step-father-na idiay Barangay Cabulanglangan, Tagudin, Ilocos Sur iti 8:45PM, May 29, 2026.
Ti biktima ket agtawen iti sangapulo ket walo, ken estudyante idinto a ti suspek ket agtawen iti uppat a pulo ket lima, awanan ti trabaho nga agpada nga agnaed iti nasao a lugar.
Iti pannaki-uman ti Bombo Radyo Vigan ken ni PMaj. Kleyvan Paycao Dalang iti Tagudin Municipal Police Station, idi umuna a lawas iti Mayo ket pinapanaw ti suspek ti biktima iti pagtaenganda isu a pimmanaw ti biktima ket nakipagnaed iti ikitna nga asideg met laeng iti balayda.
Segun ken ni Dalang, ngem idi rabii iti May 29, 2026 ket pinadas ti nabartek a suspek a napan sinukon ti biktima ngem nagsinnungbatda laeng.
Immuneg ti biktima ket napan imminom iti danum idin sinurot ti suspek ket kellaatna lattan nga innala ti kutsilyo iti ngato iti lamisaan nga isu iti imbagsolna iti akin-kannigid a paset ti tiyan ti biktima.
Gapu dayta ket inanawa dagiti nakaimatang iti pasamak ti suspek ket inruarda iti nasao a pagtaengan ket nagpaarayatda kadagiti otoridad para iti pannakakemmeg ti suspek idinto a ti biktima ket naipan iti Ilocos Sur District Hospital, Bio, Tagudin babaen ti kasinsinna para iti pannakatamingna.
Iti agdama ket nakakustodiyan ti suspek iti Tagudin Municipal Police Station ket naipilan ti kaso kontra kenkuana.
