Dakkel a tulong para kadagiti agad-adal ti panangipaay ti Provincial Government of Ilocos Sur iti 820 a lamisaan ken tugaw para kadagiti tallopulo ket tallo a Child Development Centers iti ili ti Cabugao.
Iti pannaki-uman ti Bombo Radyo Vigan ken ni Joemalyn Baltazar a President ti Child Development Worker’s Association iti Cabugao, makatulong para kadagiti ubbing nga agad-adal dagiti naipaay nangruna ket immadu ti enrollees ita a tawen ket aminadoda nga agkurkurang iti ar-aramaten dagiti ubbing.
Segun ken ni Baltazar, saan laeng a para kadagiti ubbing nu diketdi adda pay naipaay a saggaysa a laptop ken printer kasta payen ti insentibo kadagiti amin a Child Development Worker iti nasao nga ili.
Kinunana nga iti uneg ti pito a tawen a panagisurona ket adda maipapaayen a learning materials para kadagiti estudyante idi kallabes ngem nu tugtugaw ken lamisaan ket umuna a gundawayna pay laeng a nakaimatang.
Nagyaman ni Baltazar iti Provincial Government of Ilocos Sur iti panangidaulo ni Governor Jerry Singson, Local Government Unit – Cabugao babaen ti panangidaulo ni Mayor Josh Edward Cobangbang, Vice Mayor Eddie Boy Congbang, konseho ken MSWD Officer Criselda Navarro ken amin a Child Development Worker iti ili.
