Maysa a masikug ti mapapati a dinangran ti uliteg na idiay Barangay Ayusan, ili ti Sta. Lucia.
Ti biktima ket agtawen iti duapulo, innem a bulan a masikug, residente idiay Barangay Ayusan iti nadakamat nga ili.
Ti met suspek ket agtawen iti tallopulo ket dua, uliteg ti biktima, ken residente iti nadakamat nga ili.
Personal a nagturong ti biktima iti Sta. Lucia MPS, ket impakaammo na nga idi agarup alas-2:40 ti malem idi kalman, Setyembre 7, nakalugan da iti e-bike, kadua na ti nobio-na ken ti lalaki a kabsat-na a menor de edad.
Apaman nga agdaldalyasat da iti kalsada, nasabat da iti suspek a naka-motorsiklo.
Nagsardeng ti suspek ken inasitgan na ti kanakanna sana innala ti menor de edad a kabsat ti biktima ken insakay na iti motorsiklo.
Dagus met nga innala ti biktima ti kabsat na ngem bimmaba ti suspek iti motorsiklo ken minalo na ti helmet iti kannigid a paset ti tiyan ti biktima.
Pimmanaw ti suspek a nagturong iti saan a masinunuo a direksion.
Kalpasan iti sumagmamano a kanito, nag-send ti suspek iti voice message iti ama ti biktima ket mapapati a pinangtaan na ti pamilia ti kanakanna ken nangiyebkas ti madi a sarita.
