VIGAN CITY- Nalmes iti maysa a lalaki kabayatan nga agdigdigos iti kabaybayan idiay Darapidap Beach, Barangay Darapidap, Candon City, Ilocos Sur.
Nabigbig ti biktima a ni Ryan Jay Salibad Galanto, agtawen iti 23, baro ken residente ti Brgy. Rubio Galimuyod , Ilocos Sur.
Intaray dagiti kameng ti Candon City Police Station , City Disaster Risk Reduction and Management Council (CDDMRC), Bureau of Fire Protection (BFP) ken Medical Team biktima idiay St. Martin de Porres Hospital, Candon City ngem awanen iti biag na idi nakadanon iti ospital.
Iti sabali met a lugar , nakalasat manipud iti kumpay ni patay ni Corazon Quedada, agtawen iti 62, balo ken taga Nansuagao ,Caoayan agsipud ta ngangani nalmes idiay Villamar Beach, Caoayan.
Segun ti report, tumtumpaw iti kabaybayan ti biktima idi nakita da isu nga insalakan ni Darius Callo ken dagiti dadduma pay a kakadwa na ket insigida a naitaray idiay Ilocos Sur Provincial Hospital para iti naan-anay a pannakatamig na.
