Nadunor dagiti dua a menor de edad gapu iti pannaka-aksidenteda bayat a nakamotorsiklo iti Barangay road idiay Barangay Nalvo, Sta. Maria, Ilocos Sur itay parbangon, April 4, 2026.
Ti nagmaneho iti Honda TMX ket agtawen iti sangapulo ket tallo, awanan iti helment ken backride-na nga agtawen iti sangapulo ket lima a grade 11 student nga agpada nga agnaed idiay Danuman East, Sta. Maria.
Agpapabagatan a direksyon ti motorsiklo nga agturong iti national highway idin nadanonna iti sharp curve iti kalasada ket inovertake-anna iti lugan nga adda iti sangona ngem saanna a nakontrol iti motorsiklo isu a naidungpar iti road pavement ken naitinnag iti irrigation wenno canal.
Gapu dayta ket nagsagaba ti driver iti minor abrasion iti agduduma a paset iti bagina idinto a ti kaduana ket natukkol iti akin-kannigid a takyagna ken agpadada a naipan iti Ilocos Sur District Hospital – Narvacan babaen iti nagresponde nga MDRRMO-Sta. Maria para iti pannakatamingda.
Ti motorsiklo ket naipan iti Sta. Maria Municipal Police Station para iti proper disposition.
